Promovim libri në Rumani [AL]

Më 29 nëntor 2012, në Alba Iulia, kryeqyteti shpirtëror i Rumanisë, gjatë punimeve të Kongresit të 16-të Ndërkombëtar të Trashëgimisë Shpirtërore Rumune, në prani të një numuri të madh përfaqësuesish të shkencës dhe të kulturës nga 45 shtete, u promovua vëllimi poetik "Re të përmbysura", i autores Alma Basha, përkthyer në rumanisht nga akademiku Kopi Kyçyku, i cili, në parathënien që ka shkruar me këtë rast, ndër të tjera, thekson:

"Sapo të lexosh vargjet e para të Alma Bashës... ndodhesh përpara befasish të këndshme, si në rrafsh tematik, ashtu edhe në trajtimin origjinal, me mjete shprehëse të zhdërvjellta, plot figura artistike e stilistike të zgjedhura me kujdes të veçantë, gjithmonë në funksion të idesë e të mesazhit që synon të kumtojë... Letërsia 'strehon' në gjirin e saj 'motrat' e veta - muzikën, pikturën, vallzimin. Metaforat duket sikur heqin me elegancë vallen, herë dinamike, si rrjedha e lumenjve malorë, dhe herë shtruar, si ujrat kur i janë afruar detit, për të derdhur në gjirin e tij të gjerë e të thellë,xhevahiret që kanë mbledhur në udhëtimin e gjatë e pjellor...".

Të gjithë folësit, poetë e kritikë të mirënjohur të arteve e të letrave, të cilët e kishin marrë që më parë librin, vunë në dukje forcën me të cilën Alma Basha ia del mbanë të shpalosë para lexuesve vrullshëm e me tërë plotërinë, me një gjuhë krejt të vetën, një galeri të pasur ndjenjash e perceptimesh që gjallojnë në thellësitë abisale të shpirtit njerëzor, në situata e rrethana nga më të ndryshmet.

HaemusPress, 2012